မအိမ့်ကံ(34)

(Aug-09) မအိမ်ကံ
ယခင်လမှ အဆက်.....

တုံ့ခနဲ ရပ်လိုက်သော လှည်းကြောင့် ကလေးလုသူ ဟန်ချက် ပျက်သွားခဲ့သည်။ ဖိုးကူးက ရုတ်တရက် ထရပ်လိုက်ပြီး ကလေးလုသူ၏ အင်္ကျီ မပါသည့် ကျောမည်းမည်းကြီးကို နကန်နှင့် ဖြန်းခနဲ ရိုက်ချလိုက်သည်။

ကလေးလုသူက နကန်ချက်ကို နာပုံပင်မရ။ ပါးစပ်ကြီးဖြဲကာ လက်ကြမ်းကြီးများနှင့် လုမြဲလုလျက် ရှိလေသည်။ ကိုပြေသိမ်းက အမှတ်တမဲ့ကြောင် နေရာက မျက်နှာကို လက်သီးပြင်းပြင်း တစ်ချက် ထိုးလိုက်တော့မှ အူးခနဲအော်ကာ မျက်နှာကို လက်ဖ၀ါးဖြင့် အုပ်လိုက်သည်။ ဖိုးကူး၏ နကန်ချက်တွေ ဆက်ကာဆက်ကာ ကျလာသည့် အခါမှာတော့ လှည်းပေါ်က ၀ုန်းခနဲ ခုန်ချ လိုက်လေ၏။ တက်မတက် ချက်မတက် အော်နေကြသော သမီးနှစ်ယောက်ကို ထွေးပွေ့ထားရင်း လှည်းပေါ်က ကျသွားသူကို မအိမ်ကံ ငုံ့ကြည့်လိုက်သည်။ ဘယ်သူလဲ၊ ဘာသဘောလဲ။ မအိမ်ခိုင်ကို ဘာဖြစ်လို့ လုရတာလဲ။ မအိမ်ကံ နားမလည်နိုင်။ လူကလည်း အရူးတစ်ယောက်နှင့်ပင် တူနေတော့သည်။ ပြီးတော့ တလုတ် မန်ကျည်းတောထဲက ဘာကိစ္စ စောင့်နေရတာလဲ။ မအိမ်ကံတို့ လာမယ်ဆိုတာ ဘယ်သူက လက်ထောက်ချ လိုက်လို့ပါလိမ့်။ လှည်းဆက်ထွက်လာခဲ့ သော်လည်း ကလေးလုသူက လှည်းလမ်းပေါ်မှာ ကုန်းကုန်းကြီး။

“အရူးစက်ဖေဆိုသာပေါ့ မမကံ တစ်ရွာတစ်ရွာသည်လို ကူးနေတာ မမကံ မကြုံဖူးလို့ လှည်းပေါ်မှာ ကလေးပါရင် တက်လုနေကျ၊ ပြီးခဲ့တဲ့လကပဲ အနောက်ရွာက ကလေး တစ်ယောက်ကို အိမ်ပေါ်တက်လုလို့ ၀ိုင်းရိုက်လွှတ်လိုက်ကြ သေးသာ”

“အို..ကလေးလုသယ် ဟုတ်လား ဖိုးကူး။ ဟုတ်ကဲ့လားဟယ်။ အရူးစက်ဖေရယ်လို့တော့ ကြားဖူးသား။ ကလေး လုသာတော့ မကြားမိဘူး။ တော်ပါသေးရဲ့ အစ်ကိုရယ်၊ အစ်ကို သတိရှိလို့ သာပေါ့။ တော်တော်တော့ နာသွားရှာ ထင်ပါရဲ့ လှည်းပေါ်က ပြုတ်ကို ကျသွားသာ”




ဂျပန်ကို တော်လှန်ခဲ့သော တော်လှန်ရေးသမားကို ပြေသိမ်းပင် အမှတ်တမဲ့ ဆိုတော့ လန့်သွားပုံ ပေါ်ပါ၏။ ဖိုးကူးက အရူး တစ်ယောက်ပါ ဆိုတော့ စိတ်မကောင်း ဖြစ်သွားပုံ လည်းရသည်။ သမီးမအိမ်ခိုင်ကို ကြည့်လိုက်တော့ ကြေးညှော် တွေရော၊ လက်ဆုပ်အားကြောင့် အရာများပင် ထင်ကျန်ရစ် ခဲ့လေသည်။ မအိမ်မြိုင်ရော မအိမ်ခိုင်ပါ မအေ့ရင်ခွင်ထဲ တိုးဝင်နေကြသဖြင့် မအိမ်ကံ ချော့မော့နေရသည်။ ဖိုးကူးက
“ကလေးလုသာ ဇာတ်ထုပ်ရှိသယ် မမကံရဲ့။ ဦးစက်ဖေ ကြီးတို့က ပိုက်ဆံရှိကြသယ်တဲ့။ သူ့မိန်းမက မြစ်နားတန်းရွာ က စားကြူးသူ။ မိဘတွေ ရွာကိုပြန်ပြီး စစ်ပုန်းကြတုန်း ဗုံးကျင်းထဲ ဗုံးတည့်တည့်ကျလို့ မိန်းမရော၊ ကလေးတွေရော ဆုံးကြရရှာသာတဲ့”

“မင်းဟာ ဟုတ်ရဲ့လား ဖိုးကူးရာ”

“ရော် ဆရာလေးကလည်း တစ်နယ်လုံး အုန်းအုန်းထလို့ ဟာ။ ဆရာလေးရွာမှာ မရှိလို့ မကြားလိုက်သာနေမှာ”

ကိုပြေသိမ်းက ၀င်ပြောတော့ ဖိုးကူးက သေချာသပ လေညာက လုပ်နေလေ၏။ မအိမ်ကံကတော့ ဆရာလေးရွာမှာ မရှိလို့ မကြားလိုက်သာ နေမှာဆိုသည့် ဖိုးကူးစကားကြောင့် အတွေးတွေ ၀င်နေမိခဲ့သည်။ စားကြူးရွာတွေဘက် ဗုံးကျသည့် သတင်းကို မအိမ်ကံလည်း ကြားခဲ့ပါသည်။ စားကြူးရွာ ပင်မက တခြားရွာတွေလည်း ဗုံးကျတာ ရှိခဲ့ပါ၏။ သို့သော် ဦးစက်ဖေ ဇာတ်ထုပ်ကို မအိမ်ကံ မကြားမိခဲ့။ ဦးစက်ဖေတို့ မှာ ဘ၀က အကြောင်းပါလို့ စုံဖက်ကြပြီးကာမှ ကံမကောင်း အကြောင်းမလှလို့ ဘ၀ခြားကြရတာပါလား။ ဦးစက်ဖေက ပိုက်ဆံရှိလို့ ပြည့်စုံတယ် ထားပါဦး။ ကြင်ဖော်ကြင်ဖက်နှင့် ကွဲရပြီဆိုမှတော့ ဘာများ အဓိပ္ပါယ်ရှိသေးလို့လဲ။ မယားနှင့် ကလေးကို တမလွန်ပို့လိုက်ရသည့် ဘ၀ကို ခံနိုင်ရည်ရှိရှာ ဟန်မတူ။ စိတ်က ဖောက်ပြန်သော်လည်း သားသမီးဆိုသည့် မိဘမေတ္တာကတော့ ရူးသွပ်မသွားရှာပါလား။ မြင်ကရာ ကလေးကို သူ့ကလေး ထင်နေရှာလိမ့်မည်။ ကလေးကို ရန်ရှာချင်တာ မဟုတ်ဘဲ သူ့ရင်သွေးအမှတ်ဖြင့် ၀င်လုခြင်းသာ ဖြစ်လိမ့်မည်။

“အစ်ကိုရယ်၊ လူ့ဘ၀မှာ ကိုယ့်လင်၊ ကိုယ့်သား၊ ကိုယ့် မယားနဲ့ ဆင်းရဲအတူ ချမ်းသာအမျှ ဆိုသလို အတူတကွပေါင်း ဖက်နေထိုင်ရခြင်းဟာ ဘယ်လောက်များ စိတ်ချမ်းသာစရာ ကောင်းသလဲနော်။ သုံးလွန်းတင်စားပြီး ကလေးတစ်ပြုံ တောင်ကြီးနဲ့ ရုန်းရကန်ရသဲ့ အိမ်ထောင်ပဲဖြစ်ဖြစ် အတူတကွ ပေါင်းဖက်ရခြင်းဟာ မင်္ဂလာရှိနေသာပဲလို့ မအိမ်ကံတော့ တွက်သယ်”

သုံးလွန်းတင်ဆိုတာ ပြောင်း၊ ဆန်နှင့် ပဲတို့ကို ရောကျို ချက်ရသော ဆင်းရဲသားထမင်းဖြစ်ကြောင်း ကိုပြေသိမ်း သိပါ၏။ ဇောင်ချမ်းကုန်းမှာ သုံးလွန်းတင် ထမင်းစားပြီးနေကုန် ကြသူတွေ ရှိသည်။ တချို့များ ကြေးဥ၊ သမုန်းဥကိုပင် အားပြုကြရပါ၏။ သို့သော်လည်း ဆင်းရဲရန်ကော မရှိကြ။ သိုက်သိုက်ဝန်းဝန်း ရှိရှာကြသည်။ ကိုပြေသိမ်း စစ်ထွက်စဉ်က မအိမ်ကံ ကိုယ်တိုင် ခံစားရသော ခံစားမှုသည် လှည်းပေါ်မှာပင် အသစ်ပြန်ဖြစ် ရလေပြီ။ သေသည်၊ ရှင်သည် မသိ၊ အတူရှိရာမှ ပဲ့ပါသွားရသည့် ခံစားမှုကား ကြီးလှပါသည်။ မအိမ်ကံကတော့ တင်းခံနိုင်ခဲ့သည်။ သည်စကားတွေ မအိမ်ကံ ထပ်မပြောချင်တော့။ ပြီးခဲ့တာတွေလည်း ပြီးခဲ့ပြီ။ အသစ်ဖြစ် ရတိုင်း ထိုအချိန်ကာလက ခံစားမှုက ခြောက်လှန့်နေခဲ့သည်သာ။ ကိုပြေသိမ်းကတော့ မအိမ်ကံမျက်နှာကလေးကိုသာ ကြည့်လျက်ရှိပါ၏။ မအိမ်ကံ ဘာကိုဆိုလိုသလဲဆိုတာလည်း ပညာတတ်ပီပီ ခံစားနားလည်နေခဲ့သည်။ ရာကျော်ဇရပ်ကို ရောက်တော့ လှည်းမနားပါ။ ဆရာကြည့်ကို သတိရကြသဖြင့် တစ်ထောက်မနားဘဲ ခရီး ဆက်ခဲ့ကြသည်။

မြင်းခြံရောက်တော့ နေရင့်လှပြီ။ ပွဲကတော်ကြီးက ကုန်းကုန်း ကုန်းကုန်းနှင့် ဆီးကြိုရှာပါ၏။ အရွယ်အတော် အိုလှပြီဖြစ်သော်လည်း မြေးတွေ ရှင်ပြုပွဲမှာ ပျော်နေပုံရသည်။ မအိမ်ကံ ငယ်စဉ် ကလေးဘ၀ကတည်းက သည်အချိန်အထိ အမျှင်မပြတ် နှီးနွယ်ခဲ့ကြသော သံယောဇဉ်ကြောင့် သည်အလှူ ကိုမရောက်ရောက်အောင် လာခဲ့ကြခြင်း ဖြစ်သည်။

“မောင်ပြေသိမ်းတို့၊ မအိမ်ကံတို့ သားအဖ တစ်တွေကို အာရုံရှိလွန်းလို့ကို ဖိတ်ရတာပါ။ ဥတုကလည်း ပြင်းတော့ ကလေးတွေ ပန်းကြရှာမှာပဲ။ အချောကလေးတွေပါလားဟဲ့ ကိုင်း နားကြဦး၊ နားကြဦး။ ခရီးခတင်း ကရိကထကလည်း များသားကွယ့်”

“မအိမ်ကံတို့ကလည်း လာချင်နေသာပါ ပွဲကတော်ကြီးရယ်။ ပွဲမင်းကြီးကိုလည်း သတိရမိပါရဲ့။ ကျွန်မလည်း ရွာမှာ နေ့တကုပ်ကုပ်၊ ညတကုပ်ကုပ်ဆိုတော့ ခြေညောင်း လက်ဆန့် ရှိချင်တာလည်း ပါပါသယ်။ အစ်ကိုကလည်း ထနောင်းတိုင် မရောက်ဖြစ်သာ ကြာပြီလေ။ အစ်ကို့မိဘတွေလည်း မြေးတွေ လွမ်းကြရှာသယ်ကြားလို့ အပြန်ဝင်ကြဦးမလို့”

“ကောင်းပါလေ့ မအိမ်ကံရယ်။ ကိုင်းကိုင်း အိမ်အပေါ် ထပ်သာတန်းတက်ကြပါရော့ တခြားဧည့်မရှိပါဘူး။ ပြီးမှ ရေမိုးချိုးချင်သပဆိုလည်း ချိုးကြပေါ့ကွယ်။ နေ့လယ်စာ သုံးဆောင်ကြရအောင်။ နက်ဖြန်အလှူဝင်၊ သန်ဘက်ခါ အလှူကြီး၊ ဖိန်းနွှဲခါမှ ပြန်ကြပေါ့”

အိမ်ကြီးအပေါ်ထပ် အခန်းတစ်ခန်းမှာ မအိမ်ကံတို့ သားအမိ သုံးယောက်ခြေဆင်းလဲလူ အနားယူကြသည်။ ကိုပြေသိမ်းကတော့ ထုံးစံအတိုင်း လူတွေတရုန်းရုန်း မနေတတ်တော့ မြို့ထဲကို စက်ဘီး တစ်စီးနှင့် ထွက်သွားတော့သည်။ ဖိုးကူးကတော့ လှည်းချွတ် နွားစာချ ကျွေးပြီးကတည်းက ပျောက်သွားခဲ့ပြီ။ ဘိုင်စကုပ်ဆိုတာများ ရောက်သွားလေသလားမသိ။

မအိမ်ကံတို့ကို နေရာချပေးသည့် အခန်းက လှမ်းကြည့်လျှင် အလှူမဏ္ဍပ်ကို မြင်ရသည်။ မြို့အလှူဆိုပေသိ ၀ိုင်းသူ ရံသူတွေ များလှပါ၏။ ပွဲကတော်ကြီးက မြင်းခြံမြို့သူဆိုတော့ ရွာနေပြည်ထိုင်ပီပီ အသိအကျွမ်းများလှသည်။ ဈေး ဧည့်၊ ရွာဧည့်စုံလှပါ၏။ ကြက်သွန်လှီး၊ ပဲရွေး၊ ဆန်ရွေးကြသည့် မြင်းခြံသူကလေးတွေကို မြင်ရတော့သည်။ မိန်းကလေး တွေထဲမှာကော ဖက်စိမ်း ကွမ်းတောင်ကိုင် မိန်းကလေး ပါလေသလား လိုက်ကြည့်နေမိသည်။ မြို့သူကလေးတွေဆိုတော့ ယဉ်ယဉ်သန့်သန့် ကလေးတွေချည်း။ ဘယ်သူ့ဘယ်သူ ပိုလှသည် မဆိုသာ။ သည်မိန်းကလေးတွေမှာကော ဖက်စိမ်း ကွမ်းတောင် ခံစားမှုတွေ မရှိကြရော့သလား။ မအိမ်ကံတို့ ရွာမှာတော့ ဖက်စိမ်းကွမ်းတောင် ကိုင်ရခြင်းသည်ပင် တစ်ဂုဏ် မဟုတ်လား။ ကြားဖူးတာတော့ မြို့အလှူတွေမှာ ရွှေကွမ်းတောင်၊ ငွေကွမ်းတောင်၊ ကွမ်းမြှောင့်၊ ကွမ်းကလပ်တွေ တစ်ယောက် တစ်လက်ကိုင်ကြသတဲ့။ ဖက်စိမ်းကွမ်းတောင်ကို သီးသန့်ကိုင်ရသည့် မြို့အပျိုချောဆိုတာကော ရှိရဲ့လား။ အလှူနှင့် ဖက်စိမ်းကွမ်းတောင် ဆိုတာ ထွန်နောက်ရေ ပါရသလို မဟုတ်လား။ ဖက်စိမ်းကွမ်းတောင်ကိုင် ရှိရမှာပေါ့။ ထုံးမီ စံကျ မိန်းမလှတစ်ယောက်တော့ ရှိရမှာပေါ့။ သမီးကြီး မအိမ်မြိုင်ကိုပင် ပြောမိပါ၏။

“သမီး မနက်ဖြန်အလှူလှည့်မှာ ဖက်စိမ်းကွမ်းတောင် ကိုင်ရတဲ့ မိန်းကလေးကို သမီး သေသေချာချာကြည့်နော် လှလည်းလှ၊ ယဉ်လည်းယဉ် လူအများရှေ့မှာကြော့ကြော့ မော့မော့နဲ့ အင်မတန်ကျက်သရေရှိတဲ့ မိန်းမချောကွယ့်။ ငါ့သမီးကြီးရင် အဲသလိုကိုင်ရမှာ၊ မနက်ကျအမေပြမယ်နော်။ သမီးကြီးရင် ဖက်စိမ်းကွမ်းတောင် ကိုင်မယ် မဟုတ်လား သမီး”

ခြောက်နှစ်အရွယ် သမီးကလေး နားလည်လေသလား၊ မလည်လေသလား မအိမ်ကံ မစဉ်းစားနိုင်။ မအိမ်ကံဇောတွေ ကရှေ့လောကြီးလျက် ရှိပါ၏။

“ဖက်စိမ်းကွမ်းတောင်က အလေးကြီးလား အမေ”

“မလေးပါဘူး သမီးရယ်။ အပျိုဖြစ်မှကိုင်ရမှာပါ။ ငှက်ပျောရွက်ကလေးတွေနဲ့ ကွမ်းတောင်ချိုးထားတာသမီးရဲ့ သိပ်လှသာ။ အမေဆိုရင် သိပ်ကိုင်ချင်ခဲ့ရသာပေါ့ မကိုင်ခဲ့ရဘူး။ ငါ့သမီးအလှည့်ကျရင် ကွမ်းတောင်ကိုင်ရပါပြီတော်။ အဲသည်ကျမှ အမေတ၀ကြီး ထိုင်ကြည့်လိုက်စမ်းမယ်နော် သမီး”

မအိမ်မြိုင်က မအေ့မျက်နှာကို ခပ်စူးစူးလှမ်းကြည့် နေသည်။ ဘာပြောနေမှန်းလည်း သိပုံမပေါ်။ အမေ မကိုင်ခဲ့ရဘူး ဆိုတာကိုတော့ နားလည်လိုက်ပုံရပါ၏။ မျက်နှာကလေး စူရာက ပြုံးသွားလေသည်။

“အမေမှ မကိုင်ရင် သမီးလည်း မကိုင်ဘူးနော်အမေ”

“ဟယ်”

မအိမ်ကံ၏ “ဟယ်”သံက ကျယ်ကျယ် လောင်လောင်ကြီး ထွက်သွားခဲ့သည်။ သမီးကို မျက်နှာထား တင်းတင်း ကြည့်လိုက်မိသည် အထိ ထူပူသွားခဲ့သည်။ ကုဋေတစ်သန်း တန်အောင် ရွရွကလေး လှမ်းခဲ့ကာမှ ခလုတ်တိုက်ရသည့် အဖြစ်။ မဦးမချွတ် ရှိရလေခြင်းလည်း ယူကျုံးမရဖြစ်ရသည်။ မအိမ်မြိုင်ကတော့ ကလေးပီပီ သူ့စကား ဘယ်ရောက်လို့ ဘာမှန်း မသိသော်လည်း မအေဖြစ်သူ အလိုမကျတာကိုတော့ သိပုံရသည်။ မျက်လုံး အ၀ိုင်းသားနှင့် ပြန်ကြည့်နေခဲ့ သည်ပင်။ မအိမ်ကံစိတ်ကို ပြန်လျှော့လိုက်သည်။ သမီးဖြစ် သူမျက်နှာကလေး ညှိုးသွားတာကို မြင်ရတော့လည်း စိတ်ကို ထိန်းရပြန်သည်။

“အမေ မကိုင်တာ အမေက မလှလို့ မကိုင်ရတာပါ သမီးရယ်။ ငါ့သမီးက ချောလိုက် လှလိုက်သာမှ၊ ဒါမျိုးက အင်မ တန်လှတဲ့ မိန်းကလေးမှ ကိုင်ရသာကွယ့်။ နောက်ဆို သည်လို ယောင်ယောင်မှားမှား မပြောရဘူးနော် သမီး”

မအိမ်မြိုင်က ခေါင်းညိတ်တော့လည်း သမီးခေါင်းက လေးပွတ်ပေးနေမိသည်။ တစ်ခါတစ်ခါတော့လည်း မအိမ်ကံ ပြန်စဉ်းစားကြည့်မိပါ၏။ သူကိုယ်တိုင်တုန်းကတော့ မိဘ ငယ်ပေါင်းမဟုတ်လို့ ကိုင်ခွင့်မရဘဲရှိခဲ့သည်။ မပြည့်စုံဘဲ တောင့်တခဲ့ရသည့်အဖြစ်။ အခုသမီးအလှည့်ကျတော့ကော။ မိစုံဖစုံဖြစ်ပါလျက် ကြောင့်ကြ နေရပြန်ပါပကော။

နောက်တစ်နေ့ ညနေခင်းမှာ အလှူလှည့်ကြပြီ။ မြို့အလှူ ဆိုတော့စည်လည်းစည်၊ ၀တ်ကောင်းစားလှတွေနှင့် လူရည် လူရောင်တွေကလည်း ပြောင်လွန်းလှပါ၏။ သို့သော်မဏ္ဍပ် အတွင်းမှာ ကလေးနှစ်ယောက်မအေ တောသူ မအိမ်ကံကပင် အလှဆုံးဟု ဆိုနိုင်လောက်ပါ၏။ ရင့်ကျက် တည်ငြိမ်သော အလှနှင့် ပင်ကိုအလှတို့ ပေါင်းစပ် ရောနှောထားသည့် အလှက မဏ္ဍပ်တွင်းမှာ တစ်ဘာသာ ထင်ရှား ပေါ်လွင်လျက် ရှိပါ၏။ သမီးမအိမ်မြိုင်နှင့် မအိမ်ခိုင်တို့ ညီအစ်မကလည်း ဖြူစင်ဝင်း မွတ်ချစ်စရာကလေးတွေ။ မအေ့ဘေးမှာ ပုံ့ပုံ့ကလေးတွေ ထိုင်နေကြလေသည်။ မအိမ်ခိုင်က ငယ်သေးသော်လည်း မအိမ်မြိုင် ကသိတတ်သည့် အရွယ်ဆိုတော့ မဏ္ဍပ်တွင်း ၀င်လာသမျှသော ပရိသတ်တွေကို လိုက်ကြည့်နေခဲ့သည်။ ကိုပြေသိမ်းကတော့ မဏ္ဍပ်တွင်း ရှေ့ပိုင်းမှာ မြို့ခံလူကြီးတချို့နှင့် စကားကောင်း နေခဲ့သည်။

“မအိမ်ကံ၊ ထမင်းသုံးဆောင်ပြီးပလား”

မအိမ်ကံတို့ သားအမိကို လာရောက် ဧည့်ခံ နှုတ်ဆက်ကြသူတွေ များလွန်းလှသည်။ အလှူထမင်းဟင်းကို ပွဲကတော်ကြီး အိမ်ထဲအထိ အရောက်ပို့ကာ ကျွေးမွေးသဖြင့် သားအမိ သားအဖတစ်တွေ စားပြီးကြပြီ။ မအိမ်ကံက ထမင်းရုံထဲဝင်ပြီး အများနှင့် ရောနှော စားချင်လှသော်လည်း ကလေး နှစ်ယောက်နှင့် တိုးဖို့ မလွယ်တော့ အိမ်ထဲမှာပင် စားလိုက်ရပါ ၏။

“ပြီးပါပြီရှင်။ အလှူထမင်း အလှူဟင်းတော့ မအိမ်ကံက ၀မ်းအေးလွန်းလို့ ကြိုက်သယ်ရယ်။ ပွဲကတော်ကြီး အလှူ ထမင်းဟင်းကောင်းလွန်းလို့ မအိမ်ကံတို့ ရွာအပြန် ထည့်တောင် ယူသွားဦးမှာရှင့်”

မအိမ်ကံ အပြောကို ကြားရသူတိုင်းက ၀မ်းသာကြသည်။ ကိုပြေသိမ်းက ထနောင်းတိုင်သား ဆိုသော်လည်း မြင်းခြံမြို့ပေါ်ကြီး မြို့ပေါ်နေ ဆိုတော့ လူတိုင်းက သိကြသူပင်။ ထိုကျောင်းဆရာ ကိုပြေသိမ်း၏ ဇနီး တောသူကြီး သမီး မိန်းမချော မအိမ်ကံကို ဆရာကတော် အဖြစ် ချစ်ခင် လေးစားကြပါ၏။ လင်ယောက်ျားကြောင့် တစ်ဂုဏ် တက်ရလေခြင်း အောက်မေ့ကာ မအိမ်ကံမှာ ကိုပြေသိမ်းကို တိုးလို့သာ ကြည်ညိုမိရပါ သည်။

အလှူ လှည့်ခါနီးတော့ မအိမ်ကံ ရင်တွေခုန်ရလေပြီ။ ကိုပြေသိမ်းကလည်း အနားမှာ မရှိတော့ မအိမ်ကံခမျာ များလှ သောလူတွေကြားမှာ ကလေးနှစ်ယောက် လက်ဆွဲကာ တိုးရပါ၏။ အလှဆုံး ပြင်ဆင်လာကြသော မြို့ခံ မိန်းမပျိုကလေးတွေက အရောင်အသွေး အမျိုးမျိုးဖြင့် လှချင်တိုင်း လှနေကြသည်။ ခေတ်ပေါ် အ၀တ်အစား အဆင်အပြင်နှင့် လွန်လွန်ကဲကဲ ၀တ်စားထားကြသူတွေလည်း ပါသည်။ ရိုးရိုးယဉ်ယဉ် ကလေးတွေကတော့ ခပ်များများ။ ဘယ်သူလဲ ကွမ်းတောင်ကိုင်။ ဘယ်မှာလဲ ဖက်စိမ်းကွမ်းတောင်။

“မြို့မှာတော့ ကွမ်းတောင်ကိုင်ဆိုတာ ဘယ်လို ရှိလေမလဲ။ ဥစ္စာပေါရုပ်ချောထဲကလား။ ကြုံရာသင့်ရာဆွေမျိုး တစ်ယောက်ယောက် ကိုင်ကြတာများလား။ ကွမ်းတောင်ကိုင် ဆိုတဲ့ မိန်းမကောင်းတို့ရဲ့ ဂုဏ်ဟာ တော်ရိလျော်ရိနဲ့ပဲ မှေးမှိန် သွားလေမလား။ အဲသလို ဘယ်ဟုတ်ပါ့မလဲ။ ဥပဓိရုပ်ကော ကိုယ်ကျင့်တရားကော လူအများက စံထားလောက်ပါပေရဲ့လို့ သဘောအလျောက် ရွေးချယ်ခံရတဲ့ မိန်းကလေး ဖြစ်ရမှာပေါ့”

မအိမ်ကံ တစ်ယောက်တည်း တွေးနေမိခြင်းဖြစ်သည်။ လူတွေကကြိတ်ကြိတ်၊ ကြိတ်ကြိတ် တိုးဝင်လာကြတာများ မဏ္ဍပ် ကွဲမတတ်ပင်။ မဏ္ဍပ် အပြင်ဆီက ဒိုးပတ်သံ၊ အိုးစည် သံတွေက စကားပြော မဖြစ်လောက်အောင် ပွက်နေရုံမက မဏ္ဍပ်တွင်းမှာလည်း လူသံတဝေါဝေါ။ လူငွေ့ဖြင့် စို့ပြန်လာသောချွေးကို ပ၀ါနုဖြင့်တို့ရင်း မဏ္ဍပ်ရှေ့ ကန်တော့ပွဲ တင်ရာ နေရာကို မအိမ်ကံ လှမ်းကြည့်နေခဲ့သည်။ ထိုစဉ်တွင် နိဗ္ဗာန်ဆော်၏ အသံကြီး စူးထွက်လာသည်။

“အလှူလှည့်ချိန် ရောက်ပါပြီခင်ဗျာ။ သာသနာ့အလံကိုင် ဘကြီးကြွား ကြွပါခင်ဗျာ။ အလှူဦး ကန်တော့ပွဲရွက်မယ့် အမေကြီးသင် ကြွပါခင်ဗျာ။ ကိုင်း ကိုင်းမိန်းကလေးများ ကုမ္မာရီများက မဏ္ဍပ်အပြင်မှာ ရွှေကွမ်းတောင် ငွေကွမ်း တောင်များ၊ ရွှေကလပ် ငွေကလပ်များ၊ ရွှေစိန်တောင် ငွေစိန် တောင်များ၊ ရွှေကွမ်းမြှောင့် ငွေကွမ်းမြှောင့်များ၊ သင်္ကန်းမောင်း ထောင်ချိုင့်၊ ပန်းမောင်းထောင်ချိုင့်များ ဆိုင်ရာဆိုင်ရာယူ ကြပြီး တန်းစီထားကြပါ။ ဖက်စိမ်းကွမ်းတောင် ကိုင်မယ့် မိန်းကလေး မဏ္ဍပ်တွင်းက ဘုရားကျောင်းဆောင်ကိုလာ ကန်တော့ပါ။ အလှူလှည့်လိုက်မယ့်သူများက”

မအိမ်ကံက နိဗ္ဗာန်ဆော်၏ အော်သံတွေထဲ စိတ်မရောက်တော့။ ဘုရားဝင်ကန်တော့မည့် ဖက်စိမ်းကွမ်းတောင်ကိုင် မိန်းကလေးကိုပဲ မျှော်နေမိလေ၏။ ဟော ၀င်လာပါပြီ။ ပုစွန် ဆီရောင်ဖျော့ဖျော့ ပိုးချိတ်ထဘီမှာ အုတ်ခဲရောင်ကြိုးလိမ် ထားသော ခုနစ်စင်းဂမုန်းကြိုး အချိတ်နှင့် တစ်ရောင်တည်း အုတ်ခဲရောင် အင်္ကျီလက်ရှည် ၀တ်ထားသူ ကလေး။ ဆံထုံးကြီးက မြင့်မောက် လှပါ၏။ ဆံထုံးအလယ်မှာ စိန်တစ်ပွင့်။ စိန်စီ လက်ကောက် နှစ်ရံ။ စိန်လည် တုန်တစ်ကုံးဖြင့် စိန်ရောင် တဖျပ်ဖျပ် တောက်နေသည့် မိန်းမလှကလေး တစ်ယောက် ဖက်စိမ်း ကွမ်းတောင်ပွေ့ရင်း ၀င်လာခဲ့လေပြီ။ ပွေ့လာသော ဖက်စိမ်း ကွမ်းတောင်ကို ဘုရား ကျောင်းဆောင်ရှေ့က စားပွဲပေါ် အသာတင်ကာ ဘုရားသုံးကြိမ်ဝတ်ဖြည့်နေတာကို အများက ၀ိုင်းကြည့် နေကြလေသည်။ ဘုရားရှိခိုးပြီး အထမှာတော့ ပရိသတ်ကို ပြုံးရုံ ကလေးပြုံးပြပြီး ကွမ်းတောင်ကိုပွေ့ရန် ပြင်လေပြီ။

“တွေ့လားသမီး၊ တွေ့လား။ ဖက်စိမ်း ကွမ်းတောင်ကိုင် ဆိုသာ အဲသာပဲ။ လှလိုက်သာနော် သမီး၊ မိန်းကလေးတွေ အများကြီးထဲက သူတစ်ယောက်ပဲ ကိုင်ရသာ၊ လူတွေအများကြီးက သူ့ကိုရွေးထားကြသာ၊ ကုသိုလ်ထူးလိုက်ပုံ ကြည့်ကြည့်သမီး။ သမီးကြီးရင် အဲသလိုကိုင်ရမှာ။ ရှေ့ကမတ် တတ်ရပ်နေသူတွေ ထိုင်ကြပါရှင်”

မအိမ်မြိုင်ကလည်း မျက်လုံးကလေးတွေ ၀ိုင်းနေအောင် ကြည့်နေလေသည်။ လူတွေက မိုးတိုးမတ်တတ် ရပ်ကုန်ကြတော့ မအိမ်ကံက သမီးကို ပြရင်းရှေ့က ပရိသတ်ကို အော်ရသေးသည်။ မအိမ်ကံက သမီးဖြစ်သူကို ခပ်လှမ်းလှမ်းက ပြတာမျိုး မဟုတ်ပါ။ ဖြစ်နိုင်လျှင် လူတွေကြားက တိုးကာတိုးကာ ဖက်စိမ်း ကွမ်းတောင်ကို သမီးလက်နှင့် ထိခိုင်း ချင်လှသည်။ အခုတော့ မအိမ်မြိုင်ရော၊ မအိမ်ခိုင်ကိုပါ တစ်ဖက်တစ် ချက်စီတွဲကာ လူတွေကို မတိုးသာ။ ကိုပြေသိမ်း အနားရှိလျှင်လည်း အငယ်မကိုထားကာ အကြီးမကို ပွေ့ချီပြီး တိုးလိုက်ချင်စမ်းသည်။ အခုတော့ မအိမ်ကံမှာ မချင့်မရဲနှင့်ပင် ငြိမ်နေလိုက် ရပါ၏။ မဏ္ဍပ်ထဲမှာ လူတွေ အားလုံးလိုလို မတ်တတ်ရပ်ကုန် ကြေလေပြီ။ တချို့က ရုံစမ်း ထမင်းရုံတွေဘက်ကို ကူးကြမည့်သူတွေ။ တချို့က အလှူလှည့်လိုက်ကြမည့်သူတွေ။ မဏ္ဍပ်က ၀င်းကြီး ကျယ်သလောက် ထိုးထားတာ မဟုတ်ပေသိ တော်တော်ကြီးကြီး ထိုးထားခြင်းဖြစ်၏။ အပြင်မှာရွှေထီး တ၀င်းဝင်း မြင်းတွေ။ မြင်းတွေပေါ်မှာ မောင်ရင်လောင်းတွေ။

“လာလာသမီး၊ အမေတို့အပြင်ထွက်ကြည့်ကြရအောင်”

မအိမ်ကံက သမီးနှစ်ယောက် လက်ဆွဲပြီး ပရိသတ်နှင့် ရောယောင်ကာ မဏ္ဍပ်အပြင် တိုးထွက်လာခဲ့သည်။ အလှူလှည့် ကြမည့်သူတွေ တန်းပင်စီနေကြပြီ။ အလှူလှည့် မလိုက်သူတွေက ဘေးတစ်ဖက် တစ်ချက် ရံကာ ရပ်ကြရင်း လူတန်းဖြင့် ခြံခတ်ထားသလို ရှိကြလေ၏။ မအိမ်ကံက သမီး နှစ်ယောက်ကို ပခုံးကဖက်ရင်း တိုးသည်။ မအိမ်ကံတို့ သားအမိကို နေရာဖယ်ပေးကြသည်။ တိုက်ဆိုင်ချင်တော့ ဖက်စိမ်း ကွမ်းတောင်ကိုင် သူကလေးနှင့် မျက်နှာချင်းဆိုင် လာကျနေ သည်။

“အို တိုက်ဆိုင်လိုက်သာ။ သမီး ကွမ်းတောင်ကိုင် မမဆီသွားရအောင်။ သမီးကိုင်ကြည့်လို့ရသယ် အသာလေး ကိုင်နော်၊ လာသမီး”

မအိမ်ကံက သမီးအကြီးမ ကျောကို တွန်းရင်းရှေ့ကိုထွက် ဖို့ပြင်လိုက်သည်။ ကွမ်းတောင်ကိုင် မိန်းကလေးနှင့် သူတို့သား အမိဝေးလှတာမှ မဟုတ်တာ။ တစ်လံသာသာလောက်သာ ဝေးသည်။ ခြေလှမ်း နှစ်လှမ်း၊ သုံးလှမ်းစာသာ ဝေးသည်။ ထိုစဉ်မှာပင် အမျိုးသမီး တစ်ယောက် ရောက်လာကာ ကွမ်းတောင်ကိုင် မိန်းကလေး၏ လက်မောင်းကို ဆွဲလေသည်။

“မြတလေး၊ လာ လာ ရှေ့ကို။ ညည်းက ဘယ်နှယ့် သည်ကြားထဲ လာရပ်ရတာတုံး။ ရှေ့မှာနေရမှာ လာ လာ မြန်မြန်”

ကွမ်းတောင်ကိုင် မိန်းကလေး ယို့ခနဲ ပါသွားတာကို ကြည့်ရင်း မအိမ်ကံ ၀မ်းနည်းသွားခဲ့ပါ၏။ မအိမ်ကံငယ်ငယ် က မဏ္ဍပ်ထဲမှာ ဖက်စိမ်း ကွမ်းတောင်ကို ကိုင်ကြည့်ချင်လို့ ရှေ့ကိုအတိုး၊ ကိုင်ခွင့်ရခါနီးမှ အမေပန်းရုံက လက်ကိုလာ ဆွဲတာကို သတိရလိုက်မိသည်။ အလှူတန်းကြီး ရွေ့သွားသော်လည်း မအိမ်ကံတို့ သားအမိသုံးယောက် မရွေ့မိကြ။

“ကွမ်းတောင်ကိုင် မိန်းကလေးက မြတလေးတဲ့လား။ ကုသိုလ်ကံထူးပါဘိ”

အို နေစမ်းပါစေ။ စောင့်ရလှ နောက်ဆယ့်နှစ်နှစ်ပေါ့ သမီးရယ်။ သမီး အလှည့်ကြုံ ရဦးမှာပေါ့။ သည်လောက်တောင် လွဲချင်လှတာ ၀ါးတော ဆင်နင်းသလို နင်းပစ်လိုက်ရ ချေသေးပေါ့။ ၀ါးခြမ်းမနင်းမိ ၀ါးလုံး နင်းမိရမှာပေါ့။

“အိမ်ကလေး၊ အလှူလှည့်သွားပြီလေ။ လာ မဏ္ဍပ်ထဲကို”

ကိုပြေသိမ်းက လက်မောင်းကို လာဆွဲမှ မအိမ်ကံအသိ ၀င်လာခဲ့သည်။ သမီးအငယ်ကို ကိုပြေသိမ်းက ပွေ့ချီ သွားနှင့်ပြီ။ မအိမ်ကံက သမီးအကြီးမကို လက်ဆွဲရင်း မဏ္ဍပ်ထဲ ပြန်ဝင်လာခဲ့ရပါ၏။ သည်လိုနှင့် အလှူကြီးရက် နောက်တစ်နေ့ မနက်ဘက် ထနောင်းတိုင်ကို ကူးကြဖို့ ပြင်ကြရပြီ။ မအိမ်ကံက ရင်ထဲ မရှင်းတာတွေ မေးနေခဲ့ပါ၏။ မြို့မှာကော ဖက်စိမ်း ကွမ်းတောင်ကိုင်ကို ဘယ်လို ရွေးကြသလဲ။ ဘယ်လို သဘောထား ကြသလဲ။ ပွဲကတော်ကြီးက သိသမျှ ရှင်းပြသည်။

“မြို့ဆိုတော့ မအိမ်ကံရယ်။ ရွာတွေလိုတော့ ထုံးရယ် စံရယ် မဟုတ်တော့ပါဘူး။ မြင်းခြံကတော့ ရိုးရာ အစဉ်အလာ လိုက်ပါသေးတယ်။ ဒါပေမယ့်ကွယ် ကိုယ့်ရပ်ကွက်နဲ့ ကိုယ့် အလှူဆိုတော့ ကိုယ့်ရပ်ကွက်ထဲက မိန်းကလေးပဲသည်လို ရွေးလိုက်ကြရတာပါပဲ။ မြို့ဆိုတာက တခြား အရပ်ကလာ နေကြသူတွေလည်း များတာကိုး။ တစ်ဦးအကြောင်း တစ်ဦး ငယ်ကျိုးငယ်နာ အကောင်းအဆိုး မသိကြလေတော့ အပျို ရုပ်ချောချော ဥစ္စာပေါဆိုရင် ပြီးရတာများတယ်”

“ဟုတ်ပါရဲ့နော်။ မိန်းကလေး နာမည်တော့ ကြားလိုက်သယ်”

“မြတလေးတဲ့။ တို့နဲ့တူမ ၀မ်းကွဲလောက် တော်တယ်။ သူ့အစ်မက စိန်တလေးတဲ့။ စိန်တလေးက ပိုကြည့်ကောင်းသေး။ အခုက စိန်တလေး ခရီးသွားနေလို့ မြတလေး ကွမ်းတောင် ကိုင်ခိုင်းရတာလေ”

အို လွယ်လိုက်ကြတာ။ သည်လို ဘယ်ဟုတ်ပါ့မလဲ။ မြို့ဆိုတာနဲ့ပဲ အရိုးအဆက် ပျက်ရရောတဲ့လား။ ဥစ္စာပေါ ရုပ်ချော ဆွေမျိုးနီးစပ်တော်ရုံနဲ့ပဲ မြို့ကျက်သရေဆောင် ဖက်စိမ်း ကွမ်းတောင်ကိုင် ဖြစ်ရရောတဲ့လား။ မအိမ်ကံတို့ ရွာတွေမှာတော့ သည်လောက်မလွယ်ပါ။ မအိမ်ကံတို့ရွာမှ မဟုတ်ပါ။ ဘယ်ရွာမှာမဆို လိုချင်လောက်မှ လူကောက်ရ ဆိုတာမျိုးမရှိ။ ထုံးမီစံကျ အကြောင်းလှသူမှ ကွမ်းတောင်ကိုင် ဖြစ်ခွင့်ရသည်။ သည်လိုပဲ ရှိရမှာပေါ့။

“တစ်ခုတော့ ရှိတာပေါ့ မအိမ်ကံရယ်။ ရိုးရာဓလေ့ ထုံးစံ တွေဆိုတာက အဓိပ္ပာယ် မရှိတာ။ အကျိုးအကြောင်း မရှိတာမျိုးမှ မဟုတ်ဘဲ။ ရှေးလူကြီးတွေက အရှည်ကို မျှော်ကိုးပြီး သတ်မှတ်ထားကြတဲ့ ရပ်ဓလေ့ ရွာဓလေ့ လူ့စည်းကမ်းကို မအိမ်ကံတို့ ရွာတွေမှာ သည်လိုဓလေ့တွေကို ထိန်းသိမ်းစောင့် ရှောက်နေကြတာ များဖြင့် အလွန်အားရမိတယ်။ အထူးသဖြင့် မိန်းကလေးတွေရဲ့ အကျင့်သီလကို ရင်စည်း ခါးဝတ်လိုမြဲမြံအောင် ထိန်းကွပ်ပေးတဲ့ သဘောပဲလေ”

ပွဲကတော်ကြီးက မအိမ်ကံတို့ မိသားစုကို ကျွေးမွေးပြီးမှ သွားစေသည်။ အလှူက ပိုသော ဟင်းကျွေး ဟင်းရံများနှင့် မုန့်တွေပါ ချိုင့်ကြီး ချိုင့်ငယ်ဖြင့် ထည့်သို ပေးလိုက်သေးသည်။ မြင်းခြံနှင့် ထနောင်းတိုင် မဝေးလှသည့် အတွက် အေးအေးဆေးဆေး နေခိုင်းခြင်းဖြစ်သည်။ အလှူသိမ်းကိစ္စများနှင့် အလုပ်ရှုပ်နေသည့်ကြားက ပွဲကတော်ကြီးမှာ မအိမ်ကံတို့ လှည်းထွက်ခါနီးမှာ လာနှုတ်ဆက်ပြန်ပါ၏။

“ကိုင်း သွားကြရော့ သားအဖတစ်တွေ။ ၀တ္တရားများ မကျေရင်လည်း သည်းခံကြပါ။ မပန်းရုံကိုလည်း ပြောလိုက်ပါနော်။ စစ်ခိုခဲ့ရတဲ့ကျေးဇူး အထူးတင်လျက်ပါလို့။ အလှူ တစ်လှူသာ ပြောတယ်။ အလုပ်တွေကလည်း ကိုယ်မပါရင် မပြီးရတာချည်းဖြစ်နေပါတယ်”

“မအိမ်ကံတို့ကတောင် အားနာနေသာပါရှင်။ အလုပ် များမှန်းလည်း သိပါရဲ့။ ကိုင်း သွားပြီနော်။ ဒေါ်ဒေါ်”

“သွားကြရော့။ အော် ဒါထက် မအိမ်ကံရေ”

ပွဲကတော်ကြီးက လှည်းရံတိုင်ကို လက်နှစ်ဖက်ဖြင့်ဆုပ်ပြီး မအိမ်ကံနားနားကပ်ပြီး စကားပြောဖို့ ပြင်သည်။ မအိမ်ကံ ကအနားကပ်ပေး လိုက်တော့မှ ခပ်တိုးတိုးဆိုပါ၏။

“ဟိုဘက်ရွာတွေမယ် ကျောက်ကြီးရောဂါတွေ ဖြစ်နေကြ တယ်လို့ ပဲလှည်းတွေလာလို့ ကြားရတယ်။ ဥတုကလည်း ပြင်း။ တွင်းရေ၊ ကန်ရေတွေကလည်းခန်းတဲ့ အချိန်ဆိုတော့ ရောဂါဘယတွေ ဂရုစိုက်ကြကွယ့်။ ကျောက်ကြီးရောဂါနဲ့ ပျက်စီးကြသတဲ့။ မပျက်စီးတော့လည်း ရုပ်ပျက်ဆင်းပျက် ကျန်ရစ်ခဲ့ကြသတဲ့။ သည်ရောဂါဝင်ရင် တစ်ကိုယ်လုံး မီးကျီး များအုံထားသလို ပူတောက်နေတော့တာတဲ့။ ကိုင်း ကိုင်း။ သွားရော့ သွားလမ်းသာ ပြန်လမ်းချော၊ ဘေးရန်မှန်သမျှ ပိန်းကြာရွက် ရေမတင်သလို စင်စင်ကြီးလျှောကျပြီးလျှင် ချမ်းသာသုခအ၀၀ ပြည့်စုံကြပါစီ”

“ပေးသဲ့ဆုနဲ့ တလုံးတ၀တည်း ပြည့်ပါရစီ”

လှည်းထွက်လာတော့ မွန်းတိမ်းစ အညာနွေနေကပူ ပြင်းလွန်းလှပါ၏။ မအိမ်ကံက ကြက်ဆင်ဖဲထီးကို ဖွင့်ကာ သမီးနှစ်ယောက်ကို ကြက်သားအုပ်မ အတောင်နှင့် သိမ်းသလို သိမ်းအုပ်ရင်း ဆောင်းပေးခဲ့သည်။ ထနောင်းပင်တွေကတော့ နေပူကျဲ တောက်တောက်မှာ အ၀ါနှင့် အစိမ်း။

“ဘယ်နှယ့်တုံး မောင်ကံကြီးမောင်ရဲ့။ တိုင်းပြည်လည်း လွတ်လပ်ရေးရပြီးမှပဲ။ ဒါပေသိလို့ ဗမာပြည်မှာ နာရီတွေကများ ဆိုသာလို အသင်းအပင်းတွေက များလှသကော မောင်ရဲ့။ ငါတို့ဖြင့် ဘယ်လမ်းဘယ်ပန်းနဲ့ ဘယ်ခရီး ဘယ်ထီးနဲ့လို့တောင် မတွေးတတ်နိုင်အောင် ဖြစ်နေပြီ”

ထနောင်းတိုင်မှာ နေခဲ့ရသည့် ရက်များအတွင်း ကိုပြေသိမ်းတို့ အိမ်မှာ လူသူလေးပါး စည်ကားလှပါသည်။ အထူးသဖြင့် ကိုပြေသိမ်း၏ ဖခင်မှာ နိုင်ငံရေးသမားဟောင်းကြီး ဖြစ်သော်လည်း အသက်အရွယ်ရရှာပြီ။ သို့သော် တစ်နေ့တစ်နေ့ ရေနွေးပွဲကြီးခင်းကာ လက်ဖက်ပဲကြော် အစုံအလင်ဖြင့် လာသမျှ လူတွေကို ဧည့်ခံလေ့ရှိသည်။ ထနောင်းတိုင် ရွာကြီးမှာ ပညာတတ်တွေ ထွက်သည့်အပြင် နိုင်ငံရေး စိတ်ဝင်စား သူတွေလည်း များလှပါ၏။ သည်အထဲမှာ ကိုကံကြီးမောင် ဆိုသူနှင့် ကိုပြေသိမ်းက ပုလဲနံပ သင့်လွန်းလှသည်။ ကိုကံကြီးမောင်က မြန်မာ့နိုင်ငံရေးကို ခြေခြေမြစ်မြစ် ပြောနိုင်တာပါ သကဲ့သို့ အပြောအဟောလည်း ကောင်းလှပေရာ နားထောင်ရ သူများအဖို့ တ၀ါးဝါး ပွဲကျရတာမျိုးရှိသလို “တောက်” ထခေါက်ရလောက်အောင် သွေးထိုးပေးနိုင်စွမ်းလည်း ရှိသူဖြစ်၏။ ခေတ်ပညာတတ်လည်း ဖြစ်ပြန်၊ လူလုံး လူဖန်ကောင်းကောင်း ရုပ်ရည် သန့်သန့်မွန်မွန်လည်း ဖြစ်ပြန်ဆိုတော့ ယုံကြည် ကိုးစားလောက်သည့် လူလည်းဖြစ်ပုံရသည်။ စကားပြောလျှင် မျက်လုံးကြီး ပြူးကာ ပြောတတ်သည်။ ပင်ဝါနုရောင် လည်ခေါင်းတုံး အင်္ကျီကို အမြဲဝတ်သူဖြစ်ပြီး မြင်းခြံချောင်းဒေါင်းထည် ပုဆိုးနီ နက်စင်းကို မချွတ်တမ်း ၀တ်တတ်သည်။ ပိုလိုစီးကရက် တခဲခဲနှင့် အိတ်ကပ်ထဲမှာလည်း စီးကရက်ဘူးက အမြဲပါတတ်ပါ၏။

ကိုပြေသိမ်းတို့ အိမ်ကို မနက်တိုင်း ရောက်လာတတ်သူ များမှာ ကျောင်းဆရာ ကိုလှအေး၊ ပန်းထိမ်ဆရာ ကိုဘညို၊ ၀တ်လုံတော်ရ ဦးမူ၊ ကုလားကုန်သည် ဦးအီစမိုင်၊ ဆေးလိပ် ခုံပိုင်ရှင် ကိုသန်းမြ စသူတို့ဖြစ်၏။ အခြားပုဂ္ဂိုလ်များလည်း လာရောက်တတ်ကြပြီး တစ်ခါတစ်ရံ အငြင်းအခုန်များဖြင့် ရန်များထ ဖြစ်ကြတော့မလား မှတ်ရသည်။ မအိမ်ကံကတော့ အိမ်အောက်ထပ်မှာသာ အနေများသည်။ ကြီးတော်ကြီးတွေ၊ ယောင်းမ၀မ်းကွဲတွေ၊ ဆွေနီးမျိုးနီးတွေ သာမက ထနောင်းတိုင် ရွာခံတွေကပါ မအိမ်ကံတို့ သားအမိတွေ ရောက်လာကြ ကတည်းက တရုန်းရုန်း ရှိနေကြပါ၏။ ဖိုးကူးပင် ခင်သီနှင့် ရော၍ ထမင်းချောင် ရောယောင် ၀င်နေရသည်။ မီးဖိုပေါ်မှာ ရေနွေးအိုးကြီး တဗွမ်းဗွမ်း ဆူနေအောင် မီးထိုးရတာကပင် တစ်လုပ်။ ဖိုးကူးကပင် ညည်းယူရတော့သည်။

“သောက်လိုက်ကြသဲ့ ရေနွေးဗျာ။ သူတို့မှ အာခေါင် မပူသယ်။ လက်ဖက်ကလည်း ကန်တော့ပွဲပြင်သဲ့ ဇလုံကြီးနဲ့ သုပ်ရတာဗျို့ ရက်စက်သယ်”

“နေစမ်းပစီ ဖိုးကူးရယ်။ လက်ဖက်တွေ တွင်တွင်စား ရေနွေးတွေ တွင်တွင်သောက်။ ထမင်းမေ့ ဟင်းမေ့တွေ။ အစ်ကိုလေးကိုယ်က ဆင်သွားရာကျားချောင်း။ လူလိုက်ရှာနေ သာလေ။ မမကံ ယောက်ျားလည်း ဖအေ့သွေး ပါသတော့်။ ပေါ့ ပေါ့ မမှတ်နဲ့နော်”

ခင်သီပြောလည်း ပြောစရာ။ မအိမ်ကံကတော့ ရယ်နေလိုက်ပါသည်။ ဇောင်ချမ်းကုန်းလို ချောင်ကျကျရွာကလေးမှာ သည်လိုစကားတွေ ပြောမည့်သူ မရှိတော့ ကိုပြေသိမ်းမှာ ထနောင်းတိုင် လာပြီး အတိုးချ ပြောနေသလား ထင်မိပါ၏။ ဘာပဲဖြစ်ဖြစ် သူ့မိသူ့ဘ၊ သူ့ရွာ သူ့မြေ သူ့လူတွေနှင့် ကိုပြေသိမ်း ပျော်နေ ပုံရတာကိုပဲ မအိမ်ကံ ၀မ်းသာရသည်။ ကိုပြေသိမ်း မပြောပါနှင့်။ သမီးနှစ်ယောက်ကပင် ထနောင်းတိုင်မှာ ပျော်နေကြသည်။ ရွာထဲ သွားလည်ကြရတာလည်း အမော။ တစ်အိမ် မဟုတ် တစ်အိမ်က ခေါ်သွားကြတာ ဆိုတော့ လက်သာရာပါ နေကြသည်။ ရာသီကလည်း ပူပြင်းလွန်းသဖြင့် နေ့လယ် နေ့ခင်းတော့ ပြန်ပို့ပါ ပြောရပါ၏။

“ကျုပ်တို့ရွာက သစ်ကြီးဝါးကြီးပါ့ရှင်။ သူတကာ့ ရွာတွေ ပူလှပူလှနဲ့ ကျုပ်တို့ ထနောင်းတိုင် ပူချိန် မရလိုက်ပေါင်။ မြင်းခြံနဲ့ တောင်မတူဘူး။ မြင်းခြံကဟာတွေ ကျုပ်တို့ ရွာရောက်ရင် အေးကြလွန်းလို့တဲ့။ နေကြစမ်းပါစီ မအိမ်ကံရဲ့”

ထနောင်းတိုင်ရွာသူတွေ ဂုဏ်လုပ်ချင်တာကိုလည်း ပြောတော့ မပြောသာပါ။ ထနောင်းတိုင်က ဇောင်ချမ်းကုန်းထက် အရိပ်အခက်များသည်။ မြို့နှင့်နီးသည့် ရွာကြီးဆိုတော့ မြို့သွေး မြို့ရည်ရှိသကဲ့သို့ တောရိပ် တောရောင်လည်း မလွတ်ချင်။ မအိမ်ကံက အိမ်အောက်ထပ်မှာ ပျင်းလာသည့်အခါ အပေါ်ထပ် စကားဝိုင်းကို တက်သွားလေ့ရှိ၏။ တက်သွား တိုင်းလည်း ကိုကံကြီးမောင်နှင့် ပန်းထိမ်ဆရာတို့ငြင်းခုန်နေ တာတွေပဲ ကြားရပါ၏။

“ပြည်သူ့ရဲဘော် ဆိုတာက တော်လှန်ရေးတုန်းက စစ်ပညာတွေ မပျောက်ပျက်အောင် တပ်ဖွဲ့ခဲ့တာဗျ။ မြို့စောင့် နယ်စောင့်သူတို့ ရှိတာ။ သည်အထဲမှာ ရဲဘော်ဟောင်းတွေ လည်းပါသဗျာ။ ကွန်မြူနစ်တွေလည်းပါသဗျာ။ ဆိုရှယ်လစ် တွေလည်းပါသဗျာ။ ဘယ့်နှယ် ခင်ဗျားကခုမှထပြီး ဒါတွေ ပြောနေရသာတုံး”

ဂျပန် တော်လှန်ရေးပြီးကတည်းက အင်္ဂလိပ်ပြန် အ၀င်မှာ နိုင်ငံရေး အသိတွေ ပိုနားလည်လာကြသည်။ ဖဆပလ၊ ကွန်မြူ နစ်ပါတီ၊ ရဲဘော်ဖြူ၊ ရဲဘော်ဝါဆိုတာတွေ ကြားခဲ့ကြရသည်။ ကွန်မြူနစ်ပါတီမှာလည်း အလံဖြူကွန်မြူနစ်၊ အလံနီကွန်မြူ နစ်တို့နှင့်ပတ်သက်၍ အချင်းချင်း အော်ကြီးဟစ်ကျယ် ငယ်ကျိုး ငယ်နာဖော်ကြတာများကလည်း ထနောင်းတိုင်အိမ်ကြီးပေါ်မှာ ထွက်ပေါ်လျက်ရှိလေပြီ။ တော်လှန်ရေးအပြီး ပေါ်လာသော ပြည်သူ့လွတ်လပ်ရေး ပါတီဆိုတာကလည်း ရှိခဲ့ပါသေးသည်။ အမျိုးသား ခေါင်းဆောင်ကြီး ဗိုလ်ချုပ်အောင်ဆန်းနှင့် အတူ အာဇာနည် ခေါင်းဆောင်ကြီးများ ကျဆုံးခဲ့ကြသည်။ အခုလည်း လွတ်လပ်ရေးရတာပင် လေးနှစ်ကျော်ကျော်ရှိနေပြီ။ နိုင်ငံရေး စကားတွေက ပြောနေကြရတုန်းပဲလား။

“ပြောရမှာပေါ့ဗျ။ ခင်ဗျားတို့က ပါးစပ်ကပြောနေတာ။ တိုင်းပြည်က ဖြစ်ချင်တိုင်းဖြစ်နေပြီ။ ခင်ဗျားတို့က အဟော အပြောကောင်းတိုင်း လျှောက်ပြောနေတာကို ကျုပ်တို့က ယုံဖို့ခက်တယ်။ ဘာထူးသလဲ။ လက်ဝဲ ညီညွတ်ရေးဆိုတာ တွေလည်း ဘာညီညွတ်ကြလို့တုံး”

ကိုပြေသိမ်းက ပန်းထိမ်ဆရာစကားကိုထောက်ခံသည်။
“ဒါလည်းဟုတ်တာပါပဲ။ ခင်ဗျားတို့က မြို့နဲ့မြို့ရိပ်မှာ နေကြလို့ကိုး။ ကျွန်တော်တို့ရွာတွေမှာ လူစိမ်းလာရင်ကြောက် နေရတာဗျ။ တောသူတောင်သားတွေမှာ ခင်ဗျားတို့အိပ်သလို မအိပ်ကြရဘူး။ ရွာတွေမှာ အလှူကလေးမှ မလှူဝံ့။ ပွဲကလေးမှ မကြည့်ဝံ့။ မဲကြေးတောင်း၊ ဆက်ကြေးတောင်းနဲ့။ လုပ်သေနတ်နဲ့ ဓားပြကအစ ကြောက်နေကြရတယ်။ တောသူ တောင်သားတွေက နေတတ်အောင် နေနေကြရတာ။ သိပ်သနားစရာ ကောင်းတယ်။ မြို့မှာက ရာထူးယူမယ်။ အခွင့် အရေးယူမယ်။ အာဏာယူမယ်။ ဆင်းရဲတုန်းက အတူတူ အဆင်းရဲခံခဲ့ကြပေမယ့် လွတ်လပ်ရေး ရပြီးကာမှ ပိုလို့တောင် ဆိုးနေကြတယ်။ သံသယတွေ များနေကြတယ်။ ၀ါဒရေး ထက် ပုဂ္ဂိုလ် ဂိုဏ်းဂဏရေးတွေက များနေတယ်။ ကျွန်တော် တို့ရွာတွေမှာ မိုးချုပ်တာနဲ့ မီးခွက်မှုတ် နေကြရတယ်”

ကိုပြေသိမ်း ပြောနေတာကို မအိမ်ကံငေးပြီး နားထောင်သည်။ ဟုတ်တော့လည်း ဟုတ်သား။ ဇောင်းချမ်းကုန်းဘက် တစ်ကြောရွာတွေမှာ ညရယ်လို့ ကောင်းကောင်း မအိပ်ကြရ။ သေနတ်သံတွေ ကြားရသည့် ညတွေပင်များခဲ့သည်။ ဘယ်သူတွေက ဘယ်သူ့ကို ပစ်နေတာမှန်းပင် မသိရတော့။ ရွာတွေမှာ လည်း သူတစ်ဖက် ကိုယ်တစ်ဖက်၊ သူ့အုပ်စု ကိုယ့်အုပ်စုတွေ များလာသည်။ ရွာကို တရားလာဟောသူတွေလည်း ရှိသည်။ ကိုပြေသိမ်းလိုလူကပင် ငါတော့အသက်စွန့်ပြီး တော်လှန်ရေး လုပ်ခဲ့တာတောင် မှားနေပြီလားလို့ ညည်းရှာပါ၏။

“ဖဆပလ အစိုးရကကော ဘာထူးတုံး။ အိမ်ကလေးရယ်၊ ယာသမားကိုင်းသမားများခမျာ အေးအေးမနေကြရဘူး။ ရေကန်တူးလိုက်ရ၊ ကန်ဆည်လိုက်ရ၊ ကဆိုလို့ကကြရ၊ တီးဆိုလို့ တီးကြရ။ စိတ်မချမ်းသာဘဲ လုပ်နေကြရတာနဲ့ ပြီးနေရတယ်။ စပါးရောင်းပြီးတော့လည်း သူခိုးဓားပြဘေးက မလွတ်တော့ ကိုယ့်ရွာကိုယ် ကင်းစောင့် နေကြရတာက ပိုသေး”

သည်စကားမျိုး ကိုပြေသိမ်း မကြာခဏ ပြောတာကို လည်း မအိမ်ကံ သတိရသည်။ စပါးဈေး၊ ပဲဈေး၊ ၀ါဈေးတွေ ကျလာလို့ လုပ်ငန်းကိုင်ငန်း မကောင်းတာတွေ ကြုံရပါ၏။ သီးနှံပေါ်ချိန်မို့ အလှူကြီး ပေးရာမှာတောင် ဓားပြအတိုက်ခံ ရတာတွေလည်းများပြီ။ မြို့ကရဲသားတွေ အစောင့်ခေါ်ပြီး အလှူလုပ်ရတာမျိုးအထိ ဖြစ်လာခဲ့သည်။ မအိမ်ကံက နိုင်ငံရေး နားမလည်သော်လည်း စီးပွားရေးတော့ တီးမိခေါက် မိရှိပါ၏။ နေမြဲတိုင်းနေ၊ လုပ်မြဲတိုင်း လုပ်နေကြရသော်လည်း မဖူလုံကြသည့် ဘ၀တွေကို မအိမ်ကံ မြင်ခဲ့ရလှပြီ။ ကြုံခဲ့ရလှပြီ။

အိမ်ကြီးပေါ်မှာ တစ်ယောက်တစ်ပေါက်စကားတွေ ပြောကြတာ မောလာတော့မှ လူစုကွဲတော့သည်။ ကိုကံကြီးမောင် ကတော့ သူတကာ ပြန်လို့တောင်မပြန်။ ကိုပြေသိမ်းအဖေက ဆွဲထားတတ်သလို ကိုပြေသိမ်းကလည်း ကိုကံကြီးမောင်နှင့် ဆိုလျှင် လေပေးဖြောင့်သည်။ များသောအားဖြင့် မအိမ်ကံ သဘောပေါက်သလောက်တော့ ကွန်မြူနစ်ဝါဒအကြောင်းတွေ များသည်။ မအိမ်ကံကတော့ ဖဆပလလည်း မသိ။ ကွန်မြူ နစ် အဖြူအနီဆိုတာလည်း မသိ။

ပြည်သူ့ရဲဘော်တို့ ဆိုရှယ်လစ်တို့ ဆိုတာတော့ ဝေးလာဝေးကရော။ မအိမ်ကံ နားလည်တာ တစ်ချက်ပဲရှိသည်။ ကိုပြေသိမ်း အချိုးပြောင်းလာတာကိုဖြစ်ပါ၏။ ထနောင်းတိုင်ရောက်နေသည့် လေး၊ ငါးရက် အတွင်း ကိုပြေသိမ်းစကားတွေ ပြောလွန်းသည်။ ပြောသမျှလည်း အေးအေးသက်သာမရှိ။ တစ်ခါတစ်ရံ အခန့်မသင့် သူနှင့်တွေ့ လျှင် ပို၍ပင် ဆိုးတော့သည်။ အော်ကြီးဟစ်ကျယ် ရှိလာတာကို မအိမ်ကံ အံ့သြရသည်။ ကိုယ့်အိမ်ကိုလာသည့် ဧည့်သည်ကို မအော်စေချင်ကြောင်း ပြောရသည်အထိပင်။ ကိုကံကြီးမောင် နှင့်တော့ အဆင်ပြေပါ၏။ တစ်သဘောတည်း ရှိပုံရသည်။

“ကိုယ့်ကိုယ်ကိုလည်း ကျောင်းအုပ်ဆရာကြီး ဆိုတာ သတိရပါဦးမှပေါ့ အစ်ကို။ ပြီးတော့ ကိုယ့်အိမ်မှာ ကိုယ်ကဖိ ပြောနေတာကျတော့ မကောင်းဘူးပေါ့။ အစ်ကိုတို့ဟာက ကနေ့ ငြင်းခုန်အော်ဟစ်။ နောက်မနက်ကျတော့ အကောင်း။ ဒါနဲ့များ အစ်ကိုရယ် ဖြည်းဖြည်းသက်သာရှိပါမှပေါ့”

သည်လိုဆိုပြန်တော့ ကိုပြေသိမ်းကခေါင်းတညိတ်ညိတ် ရှိရှာပါ၏။ ညပိုင်း ဧည့်သည်တွေ မရှိတော့လည်း သားအဖ နှစ်ယောက် စကားကောင်းနေတတ်ကြသည်။ ဇောင်ချမ်းကုန်း ကိုပြန်ကြမည့်ရက်က ကိုကံကြီးမောင်နှင့် နှစ်ယောက် အိမ်ကြီး ပေါ်ကမဆင်း တိုးတိုးတိုးတိုး လုပ်နေလို့ မအိမ်ကံကိုယ်တိုင် စကား ၀င်ဖြတ်ရပါ၏။ ဒါတောင် ကိုကံကြီးမောင်က ကိုပြေသိမ်းကို တစ်ရက်၊ နှစ်ရက် နေခဲ့ပါဦးလုပ်နေလို့ တောင်းပန်ရသည်။ မအိမ်ကံတို့ သားအမိချည်း ရွာပြန်လွှတ် ရန်ဖြစ်၏။ ကိုပြေသိမ်းအမေက လက်မခံပါ။ သားဖြစ်သူကို မိသားစုနှင့် ပြန်စေချင်သည်။

“မင်းတို့သားအဖမလည်း ကံကြီးမောင်ကို ဓာတ်စာလုပ် နေကြသာပေါ့လေ။ မောင်နှင်းရေ ငါရင်လေးသေးသယ်။ မင်းပြန်သွားရင်မင်းအဖေ လူတရုန်းရုန်းနဲ့ ကျန်ရစ်မှာ”

မိခင်ဖြစ်သူက ကိုပြေသိမ်းကို မောင်နှင်း(သက်နှင်း)ဟု ခေါ်ခြင်းဖြစ်၍ ကျန်လူစုကတော့ သခင်နာမည် မောင်ပြေသိမ်း လို့ပဲခေါ်တာ မအိမ်ကံ သတိထားမိသည်။ ကိုကံကြီးမောင်က ကိုပြေသိမ်းကို တားမရတော့ ကျုပ်ဇောင်းချမ်းကုန်းကို လာခဲ့မယ် ဆိုလေ၏။ မအိမ်ကံပင် ပြုံးမိရသည်။ အတော်ဇွဲကြီးတဲ့ လူ။ ကိုကံကြီးမောင် ထည့်ပေးလိုက်သော အင်္ဂလိပ်စာအုပ်တွေ ပါလာတာကိုလည်း ကိုပြေသိမ်းကျေနပ်နေပုံရပါ၏။ အပြန် လှည်းပေါ်မှာပင် ဖတ်လိုက်လာခဲ့သည်။ စာအုပ်ထဲ စိတ်ပါနေတော့ ဇနီးကိုလည်းမေ့၊ သမီးတွေကိုလည်း သတိမရတော့။ စက္ကူတွေ ၀ါးစားတော့မည့်အတိုင်း မျက်လုံး စိုက်ထားလိုက်တာ စကားရယ်လို့လည်း မထွက်၊ ဘေးဘီကိုလည်း မကြည့်။

“သားအဖတစ်တွေ ခရီးသွားရတုန်း ပျော်ပျော်ပါးပါး မရှိဘူး။ ဖတ်လိုက်ရသဲ့စာ။ သည်လိုမှန်းသိ ထနောင်းတိုင် မှာထားခဲ့ရ အကောင်းသား”
မအိမ်ကံ ခနဲ့တော့မှ စာအုပ်ကို ပိတ်ကာပြုံးပြသည်။

မအိမ်ကံ ပါးကလေးကို ဆွဲလိမ်သည်။
“မအိမ်ကံကို အင်္ဂလိပ်စာသင်ပေးစမ်းပါ အစ်ကို။ ငယ်ငယ်တုန်းက အစ်ကိုမောင်မြတ်သာ သင်ပေးဖူးလို့ အနည်း အကျဉ်းတော့တတ်ပါရဲ့။ အဲသလို အင်္ဂလိပ်ဘိုးအုပ်ကြီးတွေ ဖတ်ကြည့်ချင်လို့။ ဘာတွေများကောင်းလို့လဲဆိုတာ ဖတ်လိုက် ချင်စမ်းလို့ပါ”

“၀တ္ထု မဟုတ်ပါဘူး အိမ်ကလေးရဲ့။ နိုင်ငံရေး စာအုပ်တွေပါ”

“နိုင်ငံရေးစာအုပ်တွေ၊ ဟုတ်လားအစ်ကို”

ဆင်ပေါက်ကောက် ရိုးခိုးစားပြန်ပါပကောလား။ သည်ဘ၀နိုင်ငံရေးက လွတ်ပါဦးမလား။ မင်းတိုင်း ဆယ့်နှစ်မှုပွေလို့ ရေထမ်းကာမှ ရေအိုးကွဲရသည့် အဖြစ်မျိုးကို မအိမ်ကံ ကြောက်လှပြီ။ ကိုပြေသိမ်းက လွတ်လပ်ရေးရပြီး နောက်ပိုင်း အစိုးရ အသိအမှတ်ပြု မူလတန်း ကျောင်းအုပ် ဖြစ်လာခဲ့ပါ၏။ မအိမ်ကံ ကျောင်းကလေးသည်ပင် အစိုးရကျောင်းစာရင်းဝင် ခဲ့ပြီ။ ကျောင်းအုပ်ကြီးကတော်ဆိုသည့်ဂုဏ်၊ စာသင်ကျောင်း အစ်မဆိုသည့် ဂုဏ်ဖြင့် အေးအေးလူလူ ရှိချင်လှပြီ။ သမီးကြီးပင် ခြောက်နှစ်ရှိခဲ့ပြီ။ မအိမ်ကံတို့ ကိုယ်တိုင်ပင် အသက်တွေ မငယ်ကြတော့။ နောက်ဆယ်နှစ်ဆိုလျှင်ပင် သမီးကြီးအရွယ် ရောက်ပြီ။ သည်သမီးနှစ်ယောက်ကို ဂွမ်းလိုနု၊ ဆီလို အုရုံသာရှိတော့တာ မဟုတ်လား။

မအိမ်ကံက စာအုပ်တွေကို တစ်အုပ်ချင်းကောက်ကိုင် ကြည့်သည်။ စာအုပ်တွေက လေးသားပါလား။ အားလုံး ခြောက်အုပ်။ အဖုံးမှာ နှုတ်ခမ်းမွေးနှင့် လူပုံတစ်ပုံပါသည်။ ကျန်တာ ဘာမှန်းမသိ။ မအိမ်ကံက စာအုပ်တွေကိုပြန်ချလိုက် ရင်းသက်ပြင်းတစ်မချမိရပါ၏။

“မမကံ အင်္ဂလိပ်စာသင်ရင် ကျုပ်ပါရောသင်လိုက်ချင် စမ်းဗျာ။ ကျုပ်ဆရာလေးလို အင်္ဂလိပ်ဘိုးအုပ်တွေ ဖတ်ချင်သာ မမကံရ”

ဖိုးကူးက ဘာမှန်း ညာမှန်းမသိ ၀င်ပြောလိုက်သဖြင့် မအိမ်ကံက ဖိုးကူးခေါင်းကို ဒေါင်ခနဲ ခေါက်လိုက်လေ၏။ ကိုပြေသိမ်းက တဟားဟား ရယ်လေသည်။

ထနောင်းတိုင်က ပြန်ရောက်ကတည်းက မအိမ်ကံ မနားရတော့ပါ။ ထွန်ချိန်၊ ယက်ချိန်၊ မျိုးရွေးကြချိန်ဆိုတော့ တောအလုပ်ထဲလည်းပါရ၊ ရက်ကန်းရုံလည်း ၀င်ရနှင့် ဖတ်ဖတ် မောရတော့သည်။ ကိုပြေသိမ်းကတော့ ကျောင်းပိတ်ထားချိန်မို့ သမီးနှစ်ယောက်ထိန်းရင်း စာအုပ်ဖတ်ရင်း အချိန်ကုန်နေတော့ ၏။ ၀ါဈေးတွေ ကျသော်လည်း ရက်ကန်းထည်တွေက ရက်မ နိုင်လောက်အောင် အမှာအယူများသည်။ စစ်ကြီးပြီးတာ ငါးနှစ်ခန့် ကြာပြီဆိုသော်လည်း အရောင်းအ၀ယ် ဈေးကွက်တွေ ကတော့ မငြိမ်သေး။ သည်ဘက်တစ်နှစ် နှစ်နှစ်ကျမှ ဈေးစည်လာခဲ့သည်။ စစ်ကြီးအတွင်း အစစအရာရာ ရှားပါးခရာမှ အနယ်နယ် အရပ်ရပ်မှ ကုန်ပစ္စည်းတွေ အရောက်အပေါက် အကူးအလူးများလာခဲ့သည်။ မြင်းခြံဆိပ်ကမ်းတွင် ဆိုက်ကပ် လာကြသော အနယ်နယ်မှကုန်များ အရောင်းအ၀ယ် လိုက်လာ သကဲ့သို့ မြင်းခြံနယ်ထွက်ကုန်တွေကလည်း အထွက်အပြု ကောင်းလှသည်။ လွတ်လပ်ရေးရပြီး ဖြစ်၍ နိုင်ငံရပ်ခြားမှ အထည်အလိပ်မျိုးစုံတွေ ၀င်ကြပြီဆိုသော်လည်း မြန်မာ ချည်ထည်တွေကတော့ အသုံးတွင်နေတုန်းပင်။ အထူးသဖြင့် ဖျင်ပင်နီချောတွေဆိုလျှင် မအိမ်ကံ ကိုယ်ပိုင် တံဆိပ်ထိုးကာ ရောင်းချရာမှ မအိမ်ကံထည်ဟူ၍ နာမည်ရလာခဲ့သည်။

သည်ရက်တွေထဲမှာ ကိုပြေသိမ်းကလည်း မန္တလေးကို ချည်ခင်တွေ၊ ဆိုးဆေးတွေ အ၀ယ်ထွက်ရတာတွေ ရှိလာပါ၏။ ကျောင်းတစ်ဖက်နှင့်ဆိုတော့ အခါခပ်သိမ်းတော့ လုပ်မပေးနိုင်။ ကျောင်းပိတ်ရက်ကလေးမှာ လှစ်ခနဲ ပြေးရခြင်းမျိုး ဖြစ်သည်။ မန္တလေးအထိ တက်ရမှာဆိုတော့ လည်လည်ဝယ်ဝယ် ရှိသူကို လွှတ်ရခြင်းဖြစ်၏။ ကိုပြေသိမ်းက မန္တလေးစာပုံနှိပ် စက်တစ်ခုတွင် မအိမ်ကံ၊ ဇောင်ချမ်းကုန်း၊ မြင်းခြံ ဆိုသည့် တံဆိပ်ကလေးတွေ ရိုက်လာခဲ့ခြင်းဖြစ်၏။ စာတန်းအောက်က ပင်ဖြူချည်ချောထည်၊ ပင်နီချည်ချောထည်၊ ဆေးခိုင်အာမခံသည် စသည်ဖြင့် ရိုက်ထားသေးသည်။ တံဆိပ်ကလေးပါ တော့ အထည်တွေမှာ အာရုံတစ်မျိုးရသွားသလို ခံစားရသည်။

တစ်ရက်မှာတော့ အစ်ကိုမောင်မြတ်သာနှင့် မမစိမ်းမြ တို့ ရွာကိုပြန်လာကြသည်။ အစ်ကိုတို့မှာ သားသမီးမပေါ် ပေါက်တာကိုတော့ မအိမ်ကံ စိတ်မကောင်း ဖြစ်ရပါ၏။ မမစိမ်းမြက ရွာမှာနေတုန်းကလို မဟုတ်။ နဂိုချောချောသူ ဆိုတော့ မြို့သွေး မြို့မွေးကလေးပေါက်လို့ မြို့ထည်ကလေး တွေနှင့် လိုက်ဖက်လှပါ၏။ မမစိမ်းမြက မအိမ်မြိုင်နှင့် မအိမ်ခိုင်ကိုကြည့်ရင်း အံသြနေသည်။

“ငါ့ညီမရယ် ကံကောင်းလိုက်တာအေ၊ ညီအစ်မနှစ် ယောက်ဆိုတော့ အဖော်ရတာပေါ့။ ဆိုးတိုင်ပင် ကောင်းတိုင် ပင်ပေါ့ဟယ်၊ မအိမ်ကံ အစ်ကိုက ကလေးလိုချင်သာ ရူးလို့။ မမစိမ်းမြလည်း ရုက္ခစိုးမှာ ဆုပန်ရသာနဲ့ ညောင်ပင်အောက်က မထွက်ရပါဘူးအေ”